Mir kënnen esou vill dreemen, plangen a wënschen wéi mir wëllen, mee duerch d'Liberalisatioun am Eisebunnsverkéier si vill Saachen leider bal net méi ze erfëllen.
Bréissel huet decidéiert datt de Fernverkéier sech droe muss an dat huet seng Konsequenzen. Di lescht, déi mir matgemaach hunn, ass d'Ofschafen vun den IC - Verbindungen op Nordeich. Ech wor op enger Reunioun, do huet eng Madame vun der DB äiskal virgerechend, wéi dat mat IC - Reseau wier. 55 % si rentabel, bei 35 % gi just d'Betriebskäschte gedeckt an 10 % sin defizitär. Den IC op Nordeich louch an der zweeter Kategorie. Ech hunn nach naïverweis gesot, wann di Koppe IC jo käschtenneutral wier, da kéinnt ee se jo bäibehalen. D'Madame vun der DB huet mech bekuckt a mech beléiert: Jo, am Moment sinn di Zich effektiv neutral, mee d'Material misst geschwënn ersat ginn, dat géif jo Käschte bedeiten, also, gëtt d'Relatioun defizitär, also gëtt se ofgeschaaft. Dat dann eben Lëtzebuerg an Tréier ofgehaange géifen, tjo, dat wier Pech fir deen, deen et trëfft.
An esou wäert et och mat anere Relatiounen sinn, déi net ënner de Service publique falen. Di eenzeg Chance, déi ech géif gesinn fir nees besser Verbingungen villäicht emol an d'Schwäiz ze kréien wier déi, fir eenzel TER200 Alsace vu Stroosbuerg aus bis op Lëtzebuerg ze verlängeren vu datt déi jo vun der Région Alsace, déi elo zum Grand-Est gehéiert, finanzéiert ginn.
Mee da kënnt jo schon nees deen nächste Problem: d'Sybic vun der Série BB26000 huet keen ETCS, heescht keng Autorisatioun fir den CFL-Réseau. D'SNCF huet secher keen Interesse drunn fir dës Maschinnen mat ETCS ze equipéieren, hir sinn se gutt genuch wéi se sinn.
Dir gesitt, et ass net einfach an der Eisebunnswelt am 21. Joerhonnert. Duerfir gëtt och am Beräich Eisebunn esouvill versprach, mee nëmme wéineg ka gemaach ginn, well vill technësch a finanziell Hürden ze iwwerwanne sinn. An hei ass secherlech och oft nach de politësche Wëllen déi gréissten Barriere.
