Zitat : "- Wat net verzielt guef an der Presse: dat Dokument ass den Beweis(och wann et neierens direkt sou steet), dass déi 2 Eisenbunnslinnen Ettelbreck-Dikkrech an Närzeng-Rëmeleng secher verschwannen sollen."
Och am Original-Dokument wat een um Internet-Site vun der Regierung ënner
www.gouvernement.lu
fënnt, sinn déi zwou Strecken net namentlech opgezielt. Op der Säite 113 ass eng Kaart mat de Strecken am Süden, op där ass d'Streck am Keeldall allerdings verschwonnen.
Ech hu keng kloer Ausso fonnt, ob déi Streck stëllgeluecht gëtt. Et schéint mir éischter esou ze sinn, dass déi Fro einstweilen opstoe bleift.
Dat heescht, ech hunn anersäits awer och kee Konzept entdeckt, wéi een déi Streck opwäerte kënnt, eventuell mat enger Nei-Ausriichtung op de Belval. D'Verbindungskurv tëschent Keel a Schëffleng besteet jo schonn a brauch also net extra gebaut ze ginn.
Op der Säite 143 steet eppes iwwert d'Nordstad : "Enfin, en ce qui concerne l'axe Ettelbruck - Erpeldange - Diekirch, il importe de tenir compte du fait que les terrains situés de part et d'autre du boulevard urbain présentent le plus grand potentiel de développement de la Nordstad, car idéalement situés entre les deux centres urbains Ettelbruck et Diekirch. La liaison de cet axe à la région avec une desserte performante est un des objectifs à atteindre."
Dat ass net ganz präzis, an da muss een tëschent den Zeile liesen. Respektiv hänkt et vum Standpunkt of, oder wat ee wéi définéiert.
Aus der Siicht vun engem Busentrepreneur ass de Bus sëcherlech dat performanst Transportmëttel. Fir de Bus schwätzt zum Beispill, dass hien iwwert déi bestehend Schinnen-Achs eraus op Bettenduerf oder op Veiane fuere kann, do wou bekanntlech keng Schinne (méi) leien. Mam Bus brauchen d'Leit net ëmzeklammen, wa si vun Ettelbréck op Bettenduerf oder Veiane fuere wëllen.
Performant kann awer och heeschen, dass den Zuch oder den Tram méi eng grouss Kapazitéit huet, wéi de Bus. Soll ee wierklech zu de Spëtzestonnen eng ganz Buskolonn mat Schüler a Beruffspendler tëschent Ettelbréck an Dikrech fuere loossen ?
Tëschent den Zeile liesen ech, dass déi aktuell Eisebunnsstreck eng Partie Leit stéiert. Dat si vläicht déi selwecht Leit, déi sech an den 1960er Joeren um Stater Tram gestéiert hunn, oder et si Leit déi an der Mentalitéit vun deemols hänke bliwwe sinn.
Do sinn also aner Leit gefuerdert, fir d'Schinn ze verteidegen. Ech denken an éischter Linn un den Eisebunnerlandesverband. Ech denken awer och un eng Nordstad Tram asbl déi speziell zu deem Zweck gegrënd gouf, d'Schinn tëschent Ettelbréck an Dikrech ze verteidegen, respektiv opzewäerten.
Mir hunn net nëmme Frënn an deem Dossier. Souguer sinn eenzel Leit déi eis am Dossier Stater Tram an der Zäit gehollef hunn, déi haut net méi onbedingt eis Frënn sinn, wann et drëm geet d'Bedreiwergesellschaft vum Stater Tram ze définéieren, oder wann et ëm d'Streck Dikrech - Ettelbréck geet.
De Bausche Fränz vun déi Gréng huet kee Problem mat enger privater Bedreiwergesellschaft déi de Stater Tram mitsamt Personal exploitéiert (am duebele Sënn vum Wuert), a säi Parteikolleg Albert Jacoby gesäit kee Potential fir d'Schinn an der Nordstad. Souguer beim "Mouvement" sinn ech an der Tëschenzäit iwwerzeegt, dass de Busbetrib Simon eenzelne Leit méi no ass, wéi d'CFL-Eisebunn.
Ech si perséinlech nach ëmmer dovun iwwerzeegt, dass et eng Dommheet wier, d'Strecken am Keeldall an tëschent Ettelbréck an Dikrech einfach opzeginn, ouni dass virdrun eng seriös Etüd gemaach gi wier.
Wann ech esou eng Etüd als Eenzelpersoun uregen, hunn ech kee Gewiicht. Wa méi Lei sech zesummendinn, oder wann eng Gewerkschaft esou eng Etüd fuerdert, huet dat bedeitend méi Gewiicht.
Et wier jo schéin, wa fir eemol Neel mat Käpp géife gemaach ginn.
English 
Lëtzebuerg 
Deutsch 
Français 
